شراء شقة ليس بالأمر السهل ومش بيحصل كل يوم، علشان كده المشترى لازم يكون حريص ويدرس الموضوع كويس.
هقولك نصائح لازم تراعيها فى الموضوع ده:
أولاً: مرحلة إختيار المنطقة.
١ - لازم تاخد فكرة عن الأسعار من خلال الإنترنت أو الأصدقاء والمعارف والأقارب ودى فكرة عامة عن الأسعار فى حدود كام.
٢ - متحاولش تروح منطقة أسعارها أعلى من الفلوس اللى معاك، لأن غالباً هيحصلك صدمة ومش هتشترى يا إما هتلبس فى حاجة واقعة بسعر أقل.
٣ - إدخل جروبات الفيس بوك الخاصة بالمناطق اللى بدأت تفكر فيها وأسعارها مناسبة ليك وشوف المشاكل اللى فيها وطبعاً تشوف هى تتناسب معاك ولا لأ.
يعنى فى ناس بتحب المناطق الشعبية لأن متوفر فيها محلات لكل شئ، وفى ناس تحب الهدوء والأماكن الهادية وخلافه، وفى ناس تحب المستوى اللى بين الإتنين، وفى ناس ممكن تتعايش مع وجود التوكتوك فى منطقة وناس تانية لأ.
٤- تحديد منطقتين أو أكثر وتنزل تلف لفة سريعة مش هتخسر حاجة ودى لفة من غير ما تسأل على شقق.
بعد كده إختار المنطقة اللى تتناسب معاك والمرحلة دى غالباً معظمنا بيكون محددها من البداية وعارفين هما هيشتروا فين
ثانياً: إزاى أدور على الشقة والمعاينة:
١ - تنزل المنطقة اللى ناوى تشترى فيها وتلف بنفسك، إوعى تاخد بكلام حد سواء أصدقاء أو قرايب أو جيران لأن فى إختلاف فى الأذواق، واللى غيرك منبهر به ممكن ما يعجبكش أساسا.
٢ -بلاش تتعامل مع مكاتب التسويق العقارى لأن ببساطة هياخد منك فلوس عمولة عن حاجة ممكن تعملها بنفسك وخلى بالك كتير منهم دلوقتى بياخد رسوم معاينة علشان يفرجك ولما بيقعد معاك بيعرف دماغك فيها إيه ويفرجك على حاجات مش مناسبة علشان ياخد منك رسوم معاينة وفى نفس الوقت يظهر لصاحب الشقة اللى بتتباع أنه بيعمل شغل وأنت نفسك بتكون أداة دعاية بالنسبة له لأن راغبى البيع ببيشوفوه رايح جاى بناس بتدور على شقق وفى حوارات كتير معاهم.
٣ - بوابين العمارات معاهم تفاصيل كل حاجة وهم أولى بالعمولة اللى مش هتكون أبدا زى مكاتب التسويق، لف على العمارات إسأل البوابين عن الشقق المعروضة للبيع فى عمارته أو حواليها. 
٥ - عينك لازم تيجى على كل حاجة وانت داخل العمارة من اول المدخل والسلالم والأسانسير والطرقة أدام الشقة وباب الشقة وتاخد بالك من النظافة فى المدخل والإضاءة على السلالم وحتى طريقة كلام البواب
خلى بالك التفاصيل الصغيرة هتديك فكرة عن الجيران ومدى إهتمامهم بالمكان والصيانة والتعاون بينهم فى المشكلات
٦ - التفاصيل الصغيرة بتشمل حاجات زى:
- شكل واجهة العمارة.
- النظافة أمام مدخل العمارة
- إرتفاع المدخل عن الشارع
- نظافة مدخل العمارة وشكله
- الإضاءة فى المدخل
- الأسانسير وحالته
- نظفة السلالم والإضاءة عليه
- المناور فى العمارة ونضافتها
٧ - لازم لازم تنزل البدروم وتشوف مدى نظافته وحجم الأعمدة الخرسانة فيه ومدى نضافته يعنى ميكونش فيه رشح، تسليح العمارة مهم جدا تتأكد منه بنظرة عامة مش لازم تكون متخصص، نظرة سريعة مش هتخسر حاجة ولو فى حاجة مش طبيعية هتعرفها
4- إبدأ إتفرج على أى شقق حتى لو أنت عارف إنها مش مناسبة، هتاخد خبرة وتعرف بتتفرج على إيه وعينك هتشوف التفاصيل.
ثالثاً: طيب إزاى أفضل إختيار بين الشقق اللى إتفرجت عليها، فى شوية بنود مهمة جدا لازم تاخدها فى إعتبارك وهى:
- الموقع ثم الموقع ثم الموقع، يعنى المنطقة المحيطة بيها يعنى مستوى الشارع يعنى مستوى المحلات فى الشارع يعنى عرض الشارع يعنى نظافة الشارع يعنى الشارع رئيسى أو قريب جدا من الشارع الرئيسى
بإختصار الشقة موقع
- مطل الشقة يعنى الشقة بتطل على إيه يعنى شايف إيه وانت واقف فى البلكونة أو جوه الغرف اللى على الشارع، شايف منظر مقبول شايف عمارة نضيفة شايف جيران كويسين ومحترمين ولو شايف جنينة يبقى تمام
- الشكل العام للعمارة يعنى شكل الواجهة والمدخل والسلم والأسانسير
- إرتفاع سقف الشقة لازم ميقلش عن ٢.٨٠ متر علشان النجف واللمبات لأن بقى فى عمارات سقف الدور فيها ٢.٦٠ متر
- طبعاً لو الشقة ليها عداد مياه خاص بها وموتور خاص بيها يكون ميزة كويسة جدا
والغاز والكهرباء
كل دة أنا متكلمتش عن الشقة من جوه، ومش هينفع أتكلم عنها لأن دى أذواق وإختيارات بتاعتك وفيها تفاصيل كتير
بس فى حاجات كتير بتفرق زى (المساحة الصافية والتحميل / توزيع الغرف / توزيع الحمامات ومكانها / مكان المطبخ / عرض الصالة وطولها / البلكونات ومكانها وأبعادها / .....).
ولو الشقة متشطبة خد بالك من خطواتك على السيراميك علشان لو فيه عيوب بتظهر وشوف أماكن السباكة حوالين وتحت الأحواض لو فى تسريب هيظهر مكانه
وتفحص السقف كويس خاصة عند الحمامات والمطبخ علشان لو فى مشاكل فى صرف شقة الجيران اللى فوق
ومن الحاجات المهمة إنك تبص على الشبابيك كويس لو ألومنيوم لازم تكون خامة كويسة وتقيلة وإكسسوارات متينة وبتقفل كويس "الحاجات دى سهل تعرفها لو بصيت كويس"
وفى النهاية لازم التأنى والتفكير كويس ولو أنت بتشترى شقة للسكن لازم يكون هدفك كمان إنها إستثمار ومش هتخسر فيها لو حبيت تبيع بعد كده
والمنشور الجاى هقولك إزاى تشوف الأوراق الخاصة بالشقة قبل ما تشترى
وربنا يوفق الجميع